Menu

November 2024

NUUSBRIEF 20 NOVEMBER 2024

LIEWE LESERS

Reeds is ons kniediep in November. Die einde van jaar spoed nader en daar is nie verniet mense wat hierdie ook ‘n “silly season” noem nie. Daar is geliefdes wat sommer net siek word, afsterf, ingaan vir groot operasies en lewens wat net verander met werks-dinge.

Vir my is November tot dusver fantasties gewees. Ek het my geliefde Cornelius gaan verras met ‘n verassings besoek Noordwes provinsie toe. Die moeilikste was om vir hom te moes “jok” oor wat ek alles “doen” die dag wat ek gevlieg het, aangekom het en hom by sy werk gaan verras het. Hy was inderdaad opreg bly en uit die veld geslaan om my net daar by hom te sien opdaag! Wat ‘n heerlike saamwees-tyd het ons toe gehad. Ek het gekuier tot die 11de November.

Hy het my na die Cable Way in Hartebeespoortdam geneem vir ‘n romantiese rit op met die kabelkarretjie. Die uitsig van bo af was uitsonderlik! Ons het die mooiste foto’s geneem wat julle op my Facebook (Lelanie Roode) en my privaat Instagram (lelanieroode) kan gaan kyk. Ons het vlinders gesien vlieg, wat ‘n liefdes-dans doen. Aasvoëls wat in sirkel-formasies sweef en dan weer aanvlieg tot waarnatoe hulle ookal oppad is? Hierdie diertjies het net vinnig op daardie spesifieke oomblik in tyd vir my en Cornelius kom vereer met hulle teenwoordigheid. Hierdie is die klein én GROOT wonderwerke wat ons Almagtige God oor ons paaie stuur. Ons kan kies om dit raak te sien of nie.

Dieselfde gebeur met my ook in die week toe ek my motor inneem na die paneelkloppers. Ek het nie op die oggend iemand om te gaan aflaai nie. Die panel-beaters is heel onder in die meer industriële area van die dorp van Stellenbosch. Cornelius is bekommerd maar hy sit 1500km van my af. Ek sê ek gaan terug huistoe stap wat so 6/7km stappie is. Tussen al die voetgangers, die taxi’s, padwerke ensovoorts tot weer in die midde-dorp en vandaar na my huis. So bid hierdie geliefde man vir my veiligheid. Ek laai die motor af en begin terugstap.

Reg in die middel van my pad so hele ent verder sien ek iets op die grond lê. Eers stap ek verby, ek wil nie net stop en iets optel nie, maar dit knaag aan my en ek loop die paar treë terug. Onderstebo lyk dit soos ‘n vlinder, maar toe ek dit omdraai is dit ‘n uil-gesiggie. Seker iemand se haarknip of speelding van ‘n kind wat laat val is? Ek sê altyd ek het 3 “spirit-animals”: Vlinders/Skoenlappers. Uile en perde. Die vorige aand het ek juis weer die uile in my tuin gehoor. Hier is uile wat na mekaar roep in my tuin en verder af van dak-tot-dak waar ek woon.

Hier gee Hy vir my hierdie “little miracle” net om vir my te wys: Hy sien my raak. Hy kyk na my. Hy ken my op die naam (Jesj.43:1). Ek het veilig tuis gekom met die uil-gesiggie in my handsak as teken van Sy getrouheid en beskerming. Ek vertel hierdie vir Cornelius en hy dink toe: Wat se diertjie/s sal hý kies as sy spirit-animal? Hy besluit op twee: ‘n Swaeltjie en ‘n  Paradysvoëlvleëvanger.-voël. Later daardie week is dit vir hom ‘n besondere moeilike dag. Die oggend terwyl hy koffie maak, kom ‘n swaeltjie ingevlieg in sy kombuis. Vlieg ‘n draai en vlieg weer uit. Hy gaan werk toe. Die middag/aand toe hy terugkom en hy in die slaapkamer kom hoor hy iets. Bo-op die fotoraam van ons twee saam sit ‘n Paradysvoëlvleëvanger-wyfie. Hoe die voëltjie ingekom het weet hy nie? Sy deure en vensters was toe. Hy het toe dié voëltjie versigtig gevang en weer vrygelaat buitentoe. Dis hoe getrou ons Vader in die hemel is! Wanneer ons ‘n slegte dag het. Wanneer ons baie na mekaar, ons kinders, ons ouers, ons oorlede vaders verlang, ons “battle” met die trauma’s van ons verlede, ons gespanne is oor die toekoms en dalk sommer net in die algemeen ‘n “af-dag” het, kom sulke klein en groot wonderwerke oor ons pad. Ons kan kies om dit as “toevallig” te etiketteer of ons kan kies om dit te ervaar as Sy Teenwoordigheid in ons lewe. Ons hemelse Vader en die Heilige Gees wat net “inwaai”/”invlieg”, ons voetpad kruis om vir ons amper tasbaar te wys: Hy sien ons raak. Hy het nie van ons vergeet nie! Daarom sê ek soos in Oktober se nuusbrief; liewe lesers. Wees op die uitkyk vir Sy wonderwerk(ies). Hy is in die tydsverloop. Tyd, plek, mense en geleenthede is in Sy Hande en in Sy Groter Plan. Aanvaar jou totale afhanklikheid van Hom en Hy sál jou Lei.

Nou ja, ek sê altyd: Wanneer jy in die middel van ‘n oseaan sit in ‘n roeiboot met twee spane en geen land sien nie kan jy een van twee of drie goed doen. 1. Jy kan bid . 2. Jy kan roei. OF 3. Jy kan bid asof geen roeiwerk sal help nie en jy kan roei asof geen bidwerk sal help nie! Nommer 3 is die oplossing hier. Dit is soos die woord: WONDERWERK. God doen die: WONDER. Maar Hy verwag van jou om die WERK te doen. Wanneer jy as mens die menslike moontlike doen. Moet ons Hom los om die Goddelike onmoontlike te doen.

Ek is aan die “roei”. Ek vorder fluks met die opvolg van: Olifant op ‘n sweefstok. Naamlik: Sweef & Val. Dit gaan stuk-vir-stuk na my proefleser: Danie Botha. Ek mik om November klaar te maak en dit is om die draai! 

Ek het ook: 7 Desember 2024 die STRAND LEESFEES in STRAND. Advertensie is hierby aangeheg. Help my GROOT ASSEBLIEF hiermee om dit te versprei so vêr en wyd as moontlik? Ek sal dit BAIE waardeer! Ek is een van 6 sprekers dié dag. My spreekbeurt is 11.30 vir 12h00. Dit vind plaas: by SUNSET BOOKS. No 9 Heineckestraat Strand.

Skakel Sunset Books vir meer inligting: 078 801 8218. As julle in STRAND – Wes-Kaap omgewing is, kom maak ‘n draai en koop julle Kersgeskenk. (Ek heg ook NALEDI se Kersgeskenk-boeke-lys aan). Kyk daarna en bestel online vroegtydig jou kersgeskenke vir vriende en familie. 

Ek groet julle met vele seënwense. Mag klein en groot wonderwerke julle paaie kruis. Vertel my gerus daarvan by: [email protected] Ek vertel dit weer in die volgende nuusbrief.

Ek hoop om van hierdie lesers 7 Desember by die Strand Leesfees te sien en te ontmoet? My geliefde Cornelius gaan my onderhoudsvoerder wees. Hy ken my goed. Hy het al voorheen met ‘n onderhoud gedoen. Ons doen dit weer! Kom luister

NUUSBRIEF 24 OKTOBER 2024

LIEWE LESERS

Hier is ons alweer aan die einde van nog ‘n maand. Dit was inderdaad ‘n mooi maand gewees.

Op Dinsdag 1 Oktober 2024 open ek my geliefde lewensmaat Cornelius Smit die 4de kwartaal by ons oud-hoërskool Rustenburg Hoër. Wat ‘n vol sirkel het ons lewens nie geloop nie! Die oggend voor die opening soek Cornelius sy Leerlingraad skooldas van 1988. Hy kry dit in ‘n kas vol stof nog netso geknoop. Hy kom met die das by my aan en sê: “Besef jy dat die laaste maal wat ek hierdie das om my nek gesit het en afgehaal het, was die laaste dag wat ek en jy langs mekaar gestaan het as leerlingsraadslede – Onderhoofseun en Onderhoofdogter van 1988 matrieks. Dieselfde hande van ‘n 18 jarige skoolseun het hierdie das gevou daardie dag. Nooit die knoop losgemaak nie en netso in die kas gesit. Vandag 36 jaar later haal ek dit weer uit. En raai wat? Dieselfde meisie wat in 1988 langs my gestaan het staan vandag wéér langs my. In die ‘lewe’ van hierdie das, is dit net die volgende dag!” het hy filosofies bygevoeg. Ek het sy das met ‘n nat waslap skoon gevee, letterlik en figuurlik AL die stof van 36 jaar afgevee. By die skool gekom het Cornelius die skrif-lesing, ‘n leierskap boodskap en gebed gedoen. Ek moes na hom ‘n inspirasie boodskap vir die leerders gee om saam te neem vir die 4de kwartaal. (Cornelius se opening is hierby. Luister gerus daarna. Ek sal volgende maand my video oplaai sodra ek dit van die skool ontvang.)

Cornelius Opening – Rustenburg Hoër

Toe ek by die skool aangekom het ‘n liewe oud-vriendin wat nou daar klasgee vir my haar skoolbaadjie geleen: ‘n Erekleure ‘blazer’ net soos ek op skool gedra het. Ek het gepraat oor: HOOP, GELOOF EN WONDERWERKE. Ek het vir my dogter gevra wat sou sy wou hoor toe sy op hoërskool was? En onthou sy enige van die gassprekers wat kom praat het se boodskap? Selfs net één? Sy het my geantwoord: “Mamma ek onthou daar het van tyd-tot-tyd mense kom praat met openinge. Wat hulle gesê het kan ek nie onthou nie? Wat wil ons hoor wanneer ons daar sit? Sê vir hulle hoërskool kry klaar, dit is nie ‘vir-ewig’ nie! Want vir party kinders is hoërskool regtig ‘shitty’! Gee hulle HOOP dat dit nie die ‘beginning-and-all’ van hulle lewe is nie!” Daarom toe my praatjie soos hierbo genoem.

Ek het gesê dat hoërskool kan sleg of goed wees. Hoopvol of Hooploos. Die keuse is hulle s’n. Dat die lewe gebeur met jou en die hoop wat jy nou kweek is belangrik vir die toekoms wat wag. Ek het gepraat oor die verskillende groepe in die skool: Jocks, Players, Nerds, Crims-wat-rook-en-drink, die Sluipers en die Niks-doeners en die Alles-doeners, die Boelies en dié wat geboelie word. Akademie wat goed gaan of sleg. Huis-omstandighede wat arm of ryk is, of lekker of sleg. Ouers wat druk opsit, oupas en oumas wat saamwoon of sterf, broers en susters, mense wat siek word. Geliefdes wat sterf. Alles deel van hoërskool. Maar… dis uiteindelik nét 5 jaar is. In die totaliteit van die res van jou lewe wat voorlê is dit slegs ‘n baie klein stukkie/tydperk. Op hoërskool moet jy kies: Hoop of Hopeloos? Kies HOOP. Want daardie hoop gaan jou dra vir die res van jou lewe óf jou laat val indien jy die hopelose-opsie neem. Want deur die loop van die res van jou lewe gebeur nog honderde ander goed. Ek het my eie lewe en dié van my geliefde ingevleg in my praatjie. Hoe die lewe ons gegooi het, gedraai, gemaal, gebrei het. Traumas van geliefdes wat sterf. Egskeiding, verraad, vernedering, verwerping. Die verloor van jou werk, die val-en-opstaan oor-en-oor. Soms in só mate dat mens rockbottom tref. Daar op rotsbodem vind jy dan uit Wie is die Rots! God is die Rots. Wat help jou weer op boontoe? Die HOOP in jou hart. Want met daardie HOOP begin jy ‘n Rotsvaste GELOOF te bou. Geloof wat jou dra deur al die moeilike tye. Wanneer geloof deel word van jou hoop begin mens die WONDERWERKE raaksien. Groot en klein. Jy let op dat skoenlappers jou besoek wanneer jy hartseer is óf bly. Dat Engele bestaan en jy ‘n veer in jou pad optel – wat vir my ‘n teken is dat ‘n engel besoek afgelê het. Jy sien liewenheer-besies, ‘n hottentotsgot, bloeisels wat nuwe lewe aankondig. Jy kyk uit vir nuwe geleenthede en mense kruis jou pad wat deure vir jou oopmaak. Hierdie opening vanoggend by die skool is ‘n “deur” wat vir ons oopgegaan het. My en Cornelius se wonderwerk is ons liefde na 36 jaar wat ons mekaar weer gevind het. Herontmoet het. Hierdie dag is vir ons ‘n geleentheid om ‘n verskil te maak in selfs net één lewe! Na my praatjie kom staan hy langs my, die skool klap hande. Ek bloos toe hy my hand vat, want ek weet die handeklap is vir ons twee se wonderwerk! Hy neem die mikrofoon en sluit af met die mooiste gebed.

Die middag van 2 Oktober het ek ‘n Skryfskool by Rustenburg Hoërskool aangebied wat ongelooflik goed bygewoon is. Dit was ‘n eerste vir my en ek was baie op my senuwees. Tog toe ek begin het was dit maklik. Want ek het gepraat oor wat my passie is. Ek kon sien die leerders teenwoordig het geluister en hopelik kon ek hulle iets leer wat hulle nie geweet het nie? Ek het goeie terugvoer gekry oor die Skryfskool en dit is iets wat ek verseker verder gaan neem. Nóg ‘n deur wat geopen het.

Ek is steeds besig met die opvolg van: Olifant op ‘n sweefstok. Is besig met die laaste paar hoofstukke. Dit neem tyd, want die drade moet bymekaar kom. Ek moet onthou wat ek waar in die boek gesê het en moet nou alles tot ‘n ontknoping laat uitspeel. ‘n Uitdaging inderdaad. Gelukkig is ek die outeur en ken ek die uitslag en die einde…

November is vir my die afsluitings-maand van my manuskrip sodat die laaste dele na die 1ste proefleser kan gaan. Die manuskrip gaan vandaar terugkom na my toe vir die proses van: oorskryf, herskryf, weer-skryf, by-skryf, wegneem-skryf, edit,edit,edit… Daarna gaan dit na ‘n 2de proefleser/redigeerder wat dan weer daarna kyk. Ek volg dan dieselfde proses van oorskryf, herskryf, soos hierbo genoem. ‘n Moeilike proses want soms sê die redigeerder: “kill-your-darlings” met ander woorde: Maak dit korter óf brei uit. Dan moet ek kreatief byskryf. ‘n Moeisame proses, want ons almal dink mos ons eerste “draft” is perfek! Nee, dit is vêr van perfek! Inteendeel – daar lê nog BAIE werk voor!

Ek wens julle almal ‘n wonderlike November maand toe. Gaan soek weer jou HOOP, bou aan jou GELOOF en sien die alledaagse én die uitsonderlike, bo-natuurlike WONDERWERKE in jou lewe raak. Werk asof géén gebed gaan help nie. Bid asof geen werk gaan help nie. In daardie balans vind jy jou hoop, geloof en wonderwerke. ‘n Wonderwerk is presies wat dit sê: God doen die WONDER en jy doen die WERK. Sáám maak julle ‘n WONDER-werk!

Tot volgende maand. Hope seënwense en voorspoed in oorvloed! “HEART OVER MIND. MIND OVER MATTER. ALWAYS CHOOSE TO RISE. CARPE DIEM!”

Groete