Menu

Lelanie Roode

About Lelanie Roode

https://lelanieroode.com

Posts by Lelanie Roode:

NUUSBRIEF 23 MAART 2026

Liewe Lesers,

Maart het in die Wes-Kaap aangekom soos stoom uit ’n warm ketel.—Daar is ’n hitte wat oor die Wes-Kaap lê soos ’n elektriese kombers wat op sy maksimum gestel is. Party dae voel dit asof die son nie net skyn nie, maar brand. Lukrake vure wat hoog en laag oor die velde uitbreek en alles stadig, geduldig uitput. Die lug tril, die grond sug, en selfs die skaduwees voel maar dunnerig. Dis die soort lusteloosheid wat jou noop om stadiger te beweeg, dieper asem te haal en weer bewus te word van elke druppel water en elke briesie genade.

Te midde van hierdie warm dae gaan die lewe en drome steeds voort.

Die redigering van Val en Sweef hou my besig—fyn skryfwerk wat geduld vra, maar opgewondenheid bring. Ek voel hoe die storie stadig maar seker sy finale vorm aanneem. Ek sien uit om die Engelse vertaling aan te pak. Dis asof die storie self wag om in ’n nuwe taal weer asem te kry.

Soos dit maar met my gaan—ek voel weer daardie kreatiewe roer. Ek wil skryf. Nuut. Vars. Onbekend. Nog ’n heerlike Roman… en ja, natuurlik ook die misdaadverhaal wat al lankal in die agtergrond van my gedagtes ronddwaal wil nou lewe op papier kry.

Cornelius se houtbesigheid groei stadig, maar met vaste wortels. Sy hout is droog, betroubaar en gemaak vir daardie lang, gesellige vure waar mense saamkuier en stories deel. As julle kan, help ons asseblief om die woord te versprei—deel dit op julle WhatsApp-groepe, noem dit vir vriende. Daardie eenvoudige “word-of-mouth” dra verder as wat mens ooit besef. Kontak hom by: corosmit@gmail.com

Ons Air B&B-plekkie begin ook mooi momentum kry. Jy kan ons hier bekyk en bespreek:

https://www.airbnb.co.za/rooms/1638269737709936110?unique_share_id=71fdeb8c-0f92-4115-b0be-cfbdcc52e95f&viralityEntryPoint=1&s=76

Ons is beskikbaar onder: BENEVOLENCE STAY–The Stellenbosch Way op Air B&B, Benevolence Cottage Stay op LekkeSlaap, en Benevolence Stellenbosch Stay op Bookings.com.

Dit bly vir ons ’n voorreg om ’n plek te skep waar mense kan rus, asem skep en net te wees. Gradeplegtighede by te woon, die Cape Epic en ook lekker vakansie in die wynlande van Stellenbosch..

In ’n wêreld wat soms swaar voel, bid ons saam vir vrede—dat oorloë tot ’n einde sal kom, en dat die las van onhoudbare brandstofpryse verlig sal word. Party dinge lê buite ons hande, maar nooit buite ons gebede nie.

Persoonlik bevind ek my in ’n besonderse seisoen van my lewe. Op 14 April word ek 56 jaar oud. Ek is nog nie afgetree nie… maar ek het begin uit-tree uit die vinnige baan. Ek skuif ratte laer. Ek kies doelbewus om stadiger te leef, die oomblikke raak te sien, en dit sáám met my geliefde Cornelius te geniet—om regtig in die oomblikke te wees, nie net daardeur te jaag nie.

My sussie kuier tans vir drie weke by my, en hierdie tyd saam haar is kosbaar—vol lag, onthou en eenvoudige saamwees.

Dan is daar die klein dinge wat my hart stil maak: Dis in hierdie stil heilige oomblikke waar die lewe sy ware rykdom wys.

  • Ek sit en kyk na Cornelius se vistenk—lewende vissies wat geruisloos deur water beweeg, plante wat wieg… en ek besef weer: elke klein vin, elke sagte beweging is deur ’n Groot Hand geskape.
  • Ek sien daardie Hand ook in ons eie lewe—nie net in die groot draaipunte nie, maar juis in die fyn detail.
  • ’n Vlinder wat onverwags verby fladder… wanneer ek na my oorlede pa verlang of na my kinders wat nie meer in die huis is nie.
  • My dierbare Alsation-hond, Rambo, wat my elke dag met onvoorwaardelike vreugde begroet…
  • My wonderlike geliefde mens wat sy liefde vir my op soveel manier wys. Die lekker maaltye wat hy voorberei. Die vat van my hand op ’n rusbank wanneer ons saam TV kyk of net elkeen ons storieboeke lees. Die koppie koffie elke oggend in die bed. Die saam kniel en bid as gelowige paar in ons afhanklikheid van ’n Almagtige Vader wat vir ons Voorsien op soveel vlakke. Die klein lagplooitjies wat om sy oë plooi wanneer hy ’n grappie maak of heerlik saam my lag wanneer hy my uitvang dat ek hom goedgelowig glo terwyl hy eintlik net goedig spot of ’n grappie maak.

’n Paar woorde uit my hart as romanse-skrywer:

“Ware liefde fluister nie altyd hard nie—dit bly, dit dra, dit kies… elke dag weer.”

“Om lief te hê is nie net om iemand vas te hou nie, maar om saam met hulle deur die lewe te beweeg—stadig genoeg om elke hartklop te hoor.”

Liewe lesers, dankie dat julle saam met my hierdie reis stap. Dankie dat julle lees, ondersteun en deel word van alles wat ek bou—woord vir woord, dag vir dag.

Mag hierdie maand, selfs in sy hittige Herfs seisoen, vir julle ook oomblikke van rus, vreugde en diep vrede bring.

Met liefde en alomteenwoordige dankbaarheid,

NUUSBRIEF 26 FEBRUARIE 2026

Liewe Lesers,

Februarie het met warm, helderblou energie in die Kaap aangekom. Dae vol sonbril- en sonskerm hittegolwe, maar ook dae waarin werk, drome en stille groei saamvloei. Ek sit weer hier en skryf met ’n hart wat besig is om baie dinge gelyk te dra. Stories wat vorm kry, nuwe planne wat begin wortel skiet, dankbaarheid vir mense en oomblikke wat hierdie reis ligter maak.

Die redigering van die opvolg, Val en Sweef, is nou behoorlik aan die gang. Ek gaan waarskynlik die res van Maart nog diep daarin wees. Fynwerk, hersienings en daardie stil konsentrasie wat ’n storie nodig het om werklik te land. Intussen is ons ook in onderhandeling met die finale redigeerder vir Val en Sweef—die plan is om dit teen die einde van Maart aan te stuur. Dis altyd ’n besonderse oomblik wanneer ’n manuskrip begin beweeg na sy volgende fase.

Die vertaling van Val en Sweef lê ook vir einde Maart begin April voor. Ek sien uit om dit aan te pak—om weer deur die storie te reis, maar op ’n ander manier, in ’n ander taal, met dieselfde hartklop daarin.

“’n Storie verander nie sy siel wanneer dit vertaal word nie—dit leer net om in ’n nuwe stem te asem.”

Soos dit maar gaan met ’n skrywer: daar broei en groei reeds nuwe stories in my kop. Fragmente, karakters, tonele wat onverwags kom aanklop. Ek voel daardie bekende kreatiewe krag om weer aan iets nuuts te begin werk wanneer die tyd reg is.

Om my skryfwerk en drome prakties te ondersteun, is ek ook besig om die oop kamers in my huis beskikbaar te maak vir huurders deur ’n paar nodige renovasies. Dis harde werk, maar ook opwindend om ’n huis weer vars asem te gee.

My geliefde Cornelius het selfs langverlof geneem om my daarmee te help. Ek is oneindig dankbaar vir hom. Daar is iets besonders aan iemand wat saam met jou bou—letterlik én figuurlik.

CORLANIE HOUT beweeg ook stadig maar seker vorentoe. Party dae voel ons amper soos Noag van ouds—stukkie vir stukkie, hou vol, werk voort, glo aan wat kom. Midde hierdie hitte in die Kaap is ons besig om hout bymekaar te maak vir die Wes-Kaapse winter. Ons staan in geloof dat wanneer die Kaap koud en nat raak, Kapenaars weer hul vure sal wil aansteek—en dat hulle hout by ons sal koop. En nie net enige hout nie—droë bosveldhout.

Want elke Kapenaar weet: net een ding is erger as géén hout nie… en dit is nat hout. Cornelius se hout is droog. Dit maak heerlike braaivleisvure, maar die mooi tweesydigheid daarvan is dat dit ook uitstekende, langbrand-kole maak vir kaggelvure in die winter. Dit hou langer en dra verder as baie van die houtsoorte wat mens hier in die Kaap kry.

Die terugvoer van die paar vriende wat reeds kom koop het, maak ons harte warm:

  • Dit is goeie braaivleishout.
  • Dit is droog.
  • Dit maak uitstekende kole.
  • Mens kan langer braai en hoef nie ’n kuier af te jaag nie, want die vuur hou. Hierdie soort terugvoer beteken vir ons baie.

Vanaf 27/28 Februarie sal CORLANIE HOUT ook beskikbaar wees by die AgriMark Stellenbosch se Deli-koffiewinkeltjie. Wanneer jy by die Deli in AgriMark die heerlikste pasteie in die dorp gaan koop—koop sommer ’n sakkie CORLANIE Hout saam met jou pasteitjies.

As romantikus was Valentynsdag vir my ’n besonderse dag. My geliefde was by my en ons het saam tyd spandeer. Lekker soet wafels gaan eet by Milky Lane en daarna ’n fliek gaan kyk by Ster-Kinekor — Wuthering Heights. Dit was nogal ’n swaar film vir ’n ligte dag. Steeds goed, maar nie ’n soort verhaal wat uit my eie pen sou vloei nie.

Ons het ook ’n draai gaan maak in die Cape Agulhas Nasionale Park. Wat ’n heerlike kort wegbreek! Ons is bederf met sonsondergange wat gevoel het asof dit met ons Vader se verfkwas oor die lug geskets is—kleur op kleur. Ons het vissies, krappies en seesterre in die laagwaterpoele tussen die rotse gaan kyk. Lang ente op die strand en klippiesstrande gestap, en selfs teen ’n duin gaan lê net om na die see en wolke te kyk.

Cornelius sê altyd: “Ons spandeer tydsaam tyd saam.” En dis presies wat ons doen in daardie kort, kosbare rustye saam.

Nou is ek weer terug in die tuig, besig om saam met Edit van: Val en Sweef. My gedagtes dwaal gereeld terug na daardie tydsame tyd. Ek koester dit. Ek leef in afhanklike dankbaarheid vir ’n Goeie Vader in die Hemel wat dit aan ons gun in Sy genade.

Die gedeeltes wat hierdie Februarie maand vir my uitgestaan het in Sy Woord, is Psalms, Job, Romeine en Deuteronomium. Dit herinner my weer: God laat dinge gebeur volgens Sy wil en in Sy tyd. Hy maak deure oop wat geen mens kan sluit nie. Ons staan op die Beloftes van ’n regverdige en geregtige God wat reg laat geskied aan Sy kinders—aan die wat Hom kies en volg.

Mens voel soms dat dié wat jou seergemaak het floreer, beheer uitoefen, of steeds op ’n manier aan die toue trek waarvan jy so graag wil loskom. Dan bid mens soos Dawid: “Here, hoor tog my gebede, sien my onrus raak…” Dan antwoord Hy weer en weer—soos in Jeremia 32:27: “Ek is die Here, die God van alle mense. Sou iets vir My te wonderbaar wees?”

Wanneer ek weer Deuteronomium 28 lees, die opdrag in Deuteronomium 30:19 om LEWE te kies, word mens stil. Ook Romeine 2:9 herinner my dat daar verdrukking is vir die wat kwaad doen, maar eer en vrede vir die wat goed doen. Daar is ook troos in die woorde van Romeine 12:19 en Deuteronomium 32:35: dat die vergelding aan die Here behoort. Vergifnis is joune om te gee.

Ek het onlangs ’n mooi woord raakgelees: “GODFIDENCE” — ’n stil, onwankelbare vertroue wat in geloof gewortel is. Die wete dat jy nie alleen stap nie. Dat God se tyd beter is as jou eie. Dat jy kan staan omdat Hy reeds voor jou uitgaan.

Dis iets wat Cornelius al baie vir my gesê het wanneer ek oorweldig voel of begin tol in ’n “spiral” afwaarts ’n duisternis in: “Onthou my Lieweling, God is alreeds daar voor in die pad.”

Op hierdie mooi noot groet ek julle vir Februarie. Mag Maart vir julle ’n maand wees waar God se deure wyd oopswaai. Waar die begeertes van julle harte wat Hy ken en verstaan begin vorm kry, en waar julle onthou: wat ook al voel asof dit téén jou staan—Hy wat binne-in jou leef is groter as enigiets buite jou.

Always choose to RISE.

Met liefde en dankbaarheid,

NUUSBRIEF 31 JANUARIE 2026

Liewe Lesers,

Januarie het stil-stil ingestap, tog voel alles reeds volspoed—’n nuwe jaar wat wag om gevul te word met stories, hoop en wonderwerke. Ek sit vandag en skryf met ’n hart vol dankbaarheid en ’n gees wat kinderlik opgewonde is oor die splinternuwe jaar wat voorlê.

Ek het die eerste “draft” van Olifant op ’n Sweefstok voltooi. Ek het dit geniet om die vertaling te doen. Om my storie te sien lewendig word in Engels. Dit wag nou om wéér deurgelees en fyn geslyp te word voordat dit na die Engelse proefleser gaan.

Terselfdertyd het ek begin met die editing van die opvolg, Val en Sweef, terwyl ek met die vertaling van Val en Sweef parallel daarmee aan die gang is. Dis ’n groot, maar noodsaaklike proses. ‘n Sekerheid is dat: Val en Sweef later vanjaar in beide Afrikaanse en Engelse weergawes verskyn. Die publikasie is vir Augustus–Oktober 2026 beplan, en ons kan nie wag om die wêreld te wys hoe ryk en lewendig Afrikaanse storievertelling kan wees nie.

Kersfees en oujaar-nuwejaar was vir my ’n besondere seën. Ek het dit saam my kinders en my geliefde Cornelius gevier—’n huis vol lig, lag en liefde. Op 26 Desember het ons saam my ma en sussie die Nutcracker–ballet by Monte Casino gaan kyk. Wat ’n vreugde kos vir die siel!

Cornelius se houtbesigheid, CORLANIE BOSVELDHOUT, gaan van krag tot krag. Dis 8–9 kg sakkies bosveldbraai-en kaggelhout. ’n mengsel van Sekelbos, Knoppiesdoring, Apiesdoring en bietjie harde hout. Dit verkoop fantasties! Ons begin selfs aan die Wes-Kaapse mark lewer. Die Kapenaars hou van hul vleisbraai met hout. Kaggelvure in die winter. Hierdie hout doen albei. Vanaf wors tot hoender, van steak tot kebabs, en selfs laaste–laaste, braaibroodjies op die warm afkoel-kole. Boonop: dit is droog—enige braaier weet hoe frustrerend nat hout kan wees! Indien jy in en om Stellenbosch is en jou eie sak wil koopkontak my gerus by lelanieroode@gmail.com.

Ons droom ook al meer van van plek tot plek toer deur die land met boekpraatjies in die dorpe en stede. Boeke én braaihout in die kattebak sal ons reis… Dit is nie net ’n romantiese idee nie—ons spreek dit daagliks in gebed uit en glo dat, wanneer Val en Sweef later vanjaar publiseer, dit nie meer net ’n droom sal wees nie, maar werklikheid. Ek vra julle: bid saam ons vir hierdie droom.

Die Engelse vertaling van my boeke is nie meer net ’n opsie nie; dit is ’n prioriteit om ’n voet in die internasionale mark te kry.

Ek wil julle ook graag laat vertrek met een van my gunsteling-verse uit die Bybel:

Sefanja 3:17 – “Die Here jou God is by jou. Hy, die krygsman wat red. Hy is vol vreugde oor jou, Hy is stil-tevrede in Sy liefde. Hy jubel en juig oor jou.”
Wat my nog altyd en steeds en ook vir 2026 dra.

Ek hoop dat hierdie jaar vir julle sag, vol belofte en lig begin. Mag julle drome blom waar geloof dit plant, en mag julle moed vind om dit te koester selfs wanneer die oes ver voel. Ons voel Sy teenwoordigheid elke dag in ons werk en lewe.

Met liefde, dankbaarheid en ’n hart vol verwagting,

Lelanie Kruger

“You may have to fight a battle more than once to win it.” — Margaret Thatcher.

NUUSBRIEF 23 DESEMBER 2025

LIEWE LESERS,

Desember het sag, maar vol belofte ingestap —’n maand wat altyd soos ’n asemteug voel tussen afsluit en begin. Kersliggies flikker al vroeg, en 2025 maak stadig sy laaste buiging. Ek skryf vandag met ’n dankbare hart, ’n effense moegheid in die lyf, maar ’n groot verwagting in die gees.

Skryfwerk bly my anker. Ek is steeds besig met die Engelse vertaling van Olifant op ’n Sweefstok. Ek het al gevorder tot by Hoofstuk 26 van 38, en my mikpunt is om dit teen middel Januarie 2026 af te handel. Dit is intens, maar ook besonders—’n storie wat ek nou vir die tweede keer leer ken, hierdie keer in ’n ander taal en ritme.

Intussen het ek Val en Sweef terug ontvang van die redigeerder, en ek staan op die punt om met daardie Editing te begin. Parallel daarmee loop ook die Engelse vertaling van Val en Sweef. ’n Groot maar noodsaaklike proses. Sodra dit alles afgehandel is, gaan die opvolgboek na die finale en laaste redigeerders: een vir Afrikaans en een vir Engels. As alles volgens plan verloop, mik ons na publikasie in Julie en Augustus 2026.

Daarna—en hierdie gedagte laat my glimlag—beplan ek ’n Boekbekendstelling, heel waarskynlik eerste in Stellenbosch. En ja, die droom strek verder: ’n landwye toer deur 2026–2027, waar ons al vier boeke, hierdie keer in Afrikaans én Engels, weer aan lesers bekendstel. Van dorp tot dorp. Van storie tot storie.

Agter die skerms bly die lewe natuurlik ook aan die beweeg. Ons is steeds in die beplanning vir my geliefde Cornelius se re-location. Moet asseblief nie ophou bid nie—ons hou vas aan God se Woord en Sy beloftes, dat Hy deure oopmaak wat geen mens kan sluit nie. Een van die beloftes wat ek tans styf aan vashou, is Openbaring 3:8: “Kyk, Ek het voor jou ’n deur oopgemaak wat niemand kan toemaak nie.”

Nie alles het egter hierdie jaar uitgewerk soos beplan nie. Die jeugroman wat ek graag voor 31 Desember 2025 wou voltooi, het ongelukkig gesneuwel—bloot weens te min tyd. Tog het iets anders mooi posgevat: ek het my Kinderstories, Kerneelsie Kaskenades, herskryf, verkort en vernuwe, en hoop om dit voor 31 Desember 2025 in te skryf.

Interessant genoeg het ek wel reeds aan die jeugroman begin skryf. Dit handel oor Generasie Z, en die tema lê my na aan die hart. Dit is vir my duidelik ’n storie wat tyd nodig het—en daarom sal ek dit rustig, tussen my ander projekte deur, voltooi.

Met Oukersaand en Kersdag om die draai, is my huis vol lewe. Al my kinders is by my, geskenkies lê en wag onder die kersboom. Ons doen gewoonlik ons geskenke op Oukersaand, en Oukersdag word daar reeds gesny, gekap en voorberei vir die Kersdag-ete. Ek koester dit diep om Kersdag saam met my kinders en my moeder te kan deurbring—’n kosbare seën.

My hart en wese verlang egter ook baie na my geliefde Cornelius, daar ver in die Noordwes Provinsie. Hy werk regdeur die hele Desember, ook oor al die Heilige Feesdae. Tog glo ons met alles in ons dat hierdie ons laaste Kersfees in twee provinsies is.

Dit help dat dit goed gaan met sy Bosveldhout-besigheid. Soos julle reeds weet, noem ons dit CORLANIE—Cor vir Cornelius en Lanie vir Lelanie. Die droom bly lewendig: dat ons eendag deur die land kan reis met ’n kattebak vol boeke en vuurmaakhout. Van plek tot plek, boekbesprekings en praatjies, mense ontmoet, stories deel—en vertel hoe groot en goed God is. Hoe Hy ons twee, ná twee traumatiese egskeidings, deur ’n Divine Appointment bymekaar gebring het. Hoe ’n mens selfs op 55jaar weer van voor af verlief kan raak—dieper, sagter en wonderliker as ooit tevore.

Ons leef in absolute afhanklikheid van Hom. Ons vertrou Hom om al Sy beloftes oor ons lewe waar te maak.

’n Klein, maar belangrike woord van my hart af: Ek kan ongelukkig nie altyd by elke boodskap, e-pos of WhatsApp uitkom nie. Ek het eenvoudig nie die emosionele kapasiteit om daagliks alles te lees en te beantwoord nie. Party boodskappe lê weke in my argiewe—nie uit onverskilligheid nie, maar uit noodsaak. As ek elke dag op alles sou reageer, sou ek nooit by my skryfwerk uitkom nie. Ek vra dit met respek en dankbaarheid: verstaan asseblief dat my stilte nie afwysing is nie, maar soms bloot selfbeskerming en fokus.

Laastens: vanaf Januarie 2026 sal ek my nuusbrief graag in Afrikaans én Engels wil aanbied. Ek sal my beste doen om dit reg te kry.

Ek sluit af met ’n aanhaling vir die nuwe jaar—’n gedagte om saam te dra 2026 in:

“Dreams grow best where faith is planted daily, and courage waters them even when the harvest feels far away.”

Mag hierdie Kersfees vir julle rus bring. Mag 2026 oopvlieg met hoop, lig en nuwe moed.

Met liefde, dankbaarheid en ’n hart vol verwagting!

   ”You were never meant to stay where you crawled. The cocoon exists because heaven knows you will fly.”

NUUSBRIEF 02 DESEMBER 2025

LIEWE LESERS,

November het soos ’n sagte bries oor my lewe gewaai—vinnig, bedrywig, vol oorvloed, vol dankbaarheid… en ja,ek is so tikkie laat. My opregte verskoning daaroor! Maar wanneer ’n mens se geliefde jou twee keer in een maand kom verras, raak skryfwerk sommer tweedens… en die lewe eerste. Ek koester elke oomblik.

Terwyl die dae langer raak en die jaar sy laaste draai gooi, is ek steeds hard aan die werk met die Engelse vertaling van Olifant op ’n Sweefstok. Dit is ’n groot taak, maar ook ’n vreugde—ek herontdek my eie storie deur ’n nuwe lens. Die opvolg Val en Sweef is byna deur die laaste rondte redigering; ek begin reeds in Januarie aan die vertaling werk. Ons mikpunt? Vier boeke wat in 2026 saam die lig sien: a) Herdruk van Olifant op ’n Sweefstok b) Die Engelse weergawe: Elephant on a Trapeze  c) Val en Sweef. d) Die Engelse weergawe. Iets waarvoor ek julle hulp nodig het! Ek soek ’n treffende titel—iets wat met val, swaartekrag, sweef of lig/gewig/vlieg te doen het. Enige iets poëties, pakkend, onvergeetlik. Stuur asseblief jou idees na my E-pos: lelanieroode@gmail.com

Hiermee saam werk ek ook aan navorsing vir ’n nuwe jeugroman oor Generasie Z. Ek wil hierdie storie eg, raak en eerlik skryf—en daarvoor het ek, julle lesers weereens nodig. As jy met Gen-Z werk, met hulle leef, self een is of een grootmaak… stuur vir my jou insigte, waarnemings en eerlike opinies. Jou perspektief gaan die verhaal vorm. Stuur voor op middel Desember want die sluitingsdatum vir die verhaal is einde Desember wat ek dit moet instuur.

Desember het aangebreek, en ek kan letterlik nie wag om my kersboom op te slaan nie—iets in my hart wil hierdie jaar glo, hoop en vier. Dit was ’n goeie jaar! Daar is soveel is om na uit te sien. My moeder kom kuier. My seun kom al die pad uit Nederland vir ’n hele maand kuier. ’n Kersfees om te koester. Ons almal, weer saam. Ongelukkig moet my geliefde in Noordwes werk oor die Kersseisoen, dit is natuurlik hoog-seisoen by die ATKV Buffelspoort waar hy werk. Tog, die familie-oomblikke gaan spesiaal wees.

Ons glo ook hierdie is die laaste Kersseisoen wat ek my geliefde apart moet deurbring. Ons werk aan sy “re-location” so gedurende 2026. Bid saam met ons dat dit so vir ons twee kan uitwerk? Ek is in Noordwes vanaf einde Desember tot middel Januarie, waar ons weer vir ’n rukkie saam kan wees. Ons werk so hard om ons sirkel kleiner te maak. Soms voel dit of ons Vader vir ons fluister: “Net ’n bietjie langer. Ek is besig met die plan.” En in daardie rus probeer ons leef, glo en bou.

Daar is nóg vreugdes wat blink: my sussie se dogter trou binnekort—’n groot, kosbare mylpaal vir ons hele familie. Dan neem my geliefde my vir ’n aand uit Monte Casino toe vir The Nutcracker. Julle weet ek is ’n ballet-entoesias van formaat. Ek dink ek tel al van November af die slaap-dae af tot die gordyn oplig

Praat van bou: My geliefde het begin hout verkoop! Ons besigheid het nou ’n naam: CORLANIE Bosveld Vuurmaakhout — ’n kombinasie van twee harte, twee name, en hopelik binnekort twee toekomsdrome wat in een kraal loop. Hy verkoop hout. Ek skryf boeke. En saam droom ons van ’n lewe waar ons kan rondreis en toer. ’n Motor vol storie-romanses en bosveld-hout, boekpraatjies onder sterrehemels, ’n klein vuurtjie wat knetter, ’n glasie wyn, en ’n vleisie wat sy geur saam met ons stories deur die land vloei. Mag dit ’n “veldbrand” aan die brand steek waarmee ons besig raak.

Vriende vra al grappenderwys: “Hoeveel hout moet ons koop om jou en jou geliefde permanent bymekaar te kry?” Die antwoord? Genoeg om ’n vreugdevure te bou wat ons toekoms warm hou en genoeg om ’n droom te help dra. Ons kleinsake-idee is eenvoudig, nederig, maar gebou op ’n groot God. Ons vertrou Sy beloftes—veral Sy beloftes van Hoop.

Ek sluit hierdie maand af met ’n vers wat die Here vir my onlangs gegee het toe dinge maar hak-hak gegaan het met talle huis-uitgawes en ander moeilike probleme wat opgelos moes word. Sagaria 9:12 – “Die Here sê: Ek belowe dat Ek julle dubbeld sal vergoed vir al julle swaarkry.” Dit is my anker van die maand. My belofte. My lied.

Mag November vir julle ook lig bring. Sagtheid. Nuutskepping. Die wete dat ons almal, hoe verskriklik vol die dae ook al raak, deur ’n Vader geliefd, gehou, gesorg, beskermd en voorspoedig gemaak word.

Met liefde, dankbaarheid en ’n bos vol seënwense

NUUSBRIEF 25 JUNIE 2025

Liewe Lesers,

Ek is terug in die: Bos – Stellenbosch al vanaf 31 Mei en die verlange na my geliefde is groot… Ek sit daagliks en werk aan: Olifant op ‘n sweefstok se opvolg-boek: Val en Sweef. Dit gaan maar stadig en party dae staan ek net op en gaan swem ‘n oefensessie by Coetzenburg se buite Olimpiese swembad. Soveel so dat ek ‘n vreeslike winter verkoue opgedoen het. Tog, dié spesifieke koue dag wat ek gaan swem het, om u ‘n idee te gee: dit was warmer binne-in die water as daarbuite en dit het saggies gereën. Ek dink later; dit raak nou baie koud, ek moet uitklim. Net toe breek daar ‘n sonnetjie uit! In die swem-asemhale sien ek die mooiste reënboog. Ek maak klaar, my selfoon is in my motor. Ek hardloop sopnat kar toe, en neem die reënboog af. Dit was vir my só sprekend van God se Beloftes in Sy Woord. Mens worstel soms met soveel vrae sonder konkrete antwoorde. In my swem-tyd, wat ook my bid-tyd is vra ek al daardie vrae? Bid ek vir antwoorde. Dan wanneer die antwoorde nie menslik-dadelik kom nie, stuur ons Vader Sy Reënboog! Dan is dit asof daardie onbeskryflike Vrede en vreugde binne-in my weer neerdaal en opwel, wat vir my sê: “Wag geduldig. Wees dapper, wees sterk. Ek gaan voor jou uit.” Ek het dit vanoggend weer gekry in Sy Woord: 1 Kronieke 12:18 & 13:10-16 en ook Genesis 21:22: “God is by jou in alles wat jy aanpak.”

Wat lê in Julie maand? Ek begin die maand sommer vinnig. 1 Julie voer ek ‘n onderhoud met ‘n nuwe Naledi outeur: Petro Kotze-Odendaal oor haar boek: “Wanneer die krieke stil word.” Dis ‘n outobiografie oor haar lewe. As jy of van jou vriende en of kennisse in Stellenbosch is, kom maak gerus ‘n draai tussen 15h – 18h by Aunty Sophie se kombuis by:   1 Noordwal Wes, Die Laan. RSVP by Tertia: 078 648 8616. Of val sommer net in. Dit gaan ‘n heerlike kuier-middag wees terwyl ons gesels oor haar boek. (Die uitnodiging is ook by hierdie nuusbrief aangeheg.)

My geliefde Cornelius kuier ook dan al hier by my. Hy arriveer die vorige aand (30 Junie tot 10 Julie). My tweeling-dogters gaan vir ons die klank en mikrofone behartig. Dis sommer ‘n span-poging om hierdie nuwe outeur ‘n wegspring-kans te gee om haar boek te bemark in die Kaap. Petro is van Orkney in die Noordwes-Provinsie. Dit lê my na aan die hart juis omdat my ouers jare in Stilfontein gewoon het. My moeder woon steeds in Klerksdorp na my pa se afsterwe in 2018. Ek is ook nou gereeld in die Noordwes-Provinsie met my geliefde Cornelius wat in Rustenburg-Marikana woon en werk by die ATKV Buffelspoort.

Ek besoek hom weer in Augustus-maand. As daar enige leser is wat hierdie nuusbrief lees en wil hê ek moet by julle Boekklub, Biblioteek, Werksplek, Vroue en of Manne-bidure en of albei, óf Skole (grade 11-12) ‘n praatjie gee oor: 1. Olifant op ‘n Sweefstok. 2. Die wonderwerke wat God ook in my eie lewe en die van my geliefde Cornelius gedoen het – vir ons ‘n liefde gegee het, ‘n vrede wat alle verstand te bowe gaan. 3. ‘n Kykie na die opvolg-storie van Olifant op ‘n sweefstok: wat tans die titel dra: “Val en sweef.” Kontak my asseblief ASAP by: (lelanieroode@gmail.com) sodat ek die datums met my besoek en vlugkaartjies kan sinchroniseer. Ek doen dit graag. 

Die nuusbrief is nie so lank hierdie maand nie. My webtuiste-bestuurder: Donovan Risk by: AEON WOLF (PTY)LTD het my oortuig om in Julie 2025, twee(2x) nuusbriewe uit bring… Ek glo ek sal dit doen. Ek sal hierdie lesers graag wil vertel hoe die bogenoemde onderhoud met Petro Kotze-Odendaal gegaan het? Ook sal ek graag besprekings wil akkommodeer met my Augustus-besoek aan die Noordwes-Provinsie en Gauteng. Natuurlik ook sover as Klerksdorp, Stilfontein en Potchefstroom. As ek genoegsame kennis het van die datums werk ons dit in ons program.

Ons het egter een vaste afspraak: 9 Augustus gaan ek en Cornelius na Monte Casino vir: Joseph and the Technicolour Dreamcoat. Ek sien baie uit daarna. So op Vrouedag is dit wat ons gaan doen om dit te vier.

Ek wens een en elkeen ‘n mooi winters-Julie maand toe. Sit knus voor die kaggelvuurtjies. Films wat ek onlangs gekyk het en kan aanbeveel, lekker “feel-good-movies” is op Netflix: Find me falling. Holiday in the Wild. Nonnas. Op Prime: A week in Paradise.

Vele seënwense en ‘n aanhaling van: William James: “The power to move the world is in your subconscious mind.”

Groetnis: Lelanie Roode

NUUSBRIEF 30 JANUARIE 2025

Liewe Lesers,

Nuwe jaar, nuwe uitdagings, geleenthede en keuses. Dit is soms oorweldigend om ‘n hele nuwe jaar voor jou uitgetrek te sien lê. Mens maak jou voornemens maar God maak die planne. Hy verander dit ook. My filosofie: Los die voornemens. Sit jou hand in Syne en al jou voornemens sal geluk is Sy Belofte. Hy sê nie wanneer of hoe laat nie? Soms neem Hy langer as wat ons sou wou hê Hy moet. Alles moet eintlik mos DADELIK gebeur! God neem Sy tyd maar Hy is deeglik en nooit ooit laat nie.

Die goeie nuus wat ek het om te deel is dat Naledi Olifant op ‘n sweefstok 26 Januarie 2025 vrygestel het as ‘n e-boek op AMAZON.  Die skakel is as volg: https://amzn.to/4awU4aA bestel gerus jou e-boek aanlyn. Laat groot asseblief vir my ‘n review op Amazon en copy & paste sommer daardie review na my webtuiste by Naledi: https://naledi.co.za/product/olifant-op-n-sweefstok/  ‘n Positiewe review help altyd om die  aanlyn verkope asook enige Boekwinkel verkope aan te help.

Ek gaan ook gesels op ‘n radiostasie die 7de of 8ste Februarie, nog nie seker watter een nie? (Jammer daaroor. Ek het nog nie al die inligting nie.) Gelukkig sal daar ‘n pod-uitsending wees. Ek sal dit in my Februarie Nuusbrief vir julle plaas om te gaan luister. Mens is soms nie op die dag en tyd van ‘n uitsending noodwendig voor ‘n radio nie. Dit is vir 5 Februarie wat Wêreld-voorlees-dag is.

Op ‘n meer persoonlike noot; ek en my geliefde Cornelius kon Desember/Januarie een hele maand aaneenlopend saam wees. Dit was kosbare tye saam. In ‘n verhouding waar ons maandeliks moet commute om mekaar te kan sien, (meestal net vir een of hoogstens twee weke) was ‘n hele maand saam ‘n geskenk. Iets wat ons elke oomblik van gekoester het in mekaar se geselskap, saam vriende en familie ook. Ons bid steeds saam dat daar vir hom ‘n pos sal oopgaan in Stellenbosch waar ek woonagtig is. ‘n Re-location van sy kant af maak meer sin, aangesien ek nog my studente dogters in die huis het. Tog vertrou ons die Here om ook daardie deur vir ons te ontsluit op Sy presiese gegewe tyd. Teen dié tyd wéét ons: Hy is in die tydsverloop. Ons was in Noordwes Provinsie, Weskaap en ook Struisbaai, Agulhas.  Ons het die mooiste herinneringe gemaak. Die Lighthouse in Agulhas is iets om te beleef! Ons het tot bo geklim teen die styl leertjie op. Die uitsig daarvandaan is asemrowend! Dis ook die mees Suidelike punt van Afrika. Ekself is gek oor VUURTORING. Dit is só ‘n standvastige simbool van Rotsvas met ‘n Lig wat koers aandui én waarsku.

Ek is weer in Noordwes Provinsie vanaf 19 Februarie tot 3/4 Maart. Ek hoop om dan die opvolg van: Olifant op ‘n sweefstok af te handel. Nee… dit is nóg nie klaar nie – tot my proefleser Danie Botha se frustrasie! Hy wil nou weet wat gaan gebeur? Toe sê ek vir hom: Ek óók!   Hy dink nie ek is snaaks nie… Want ek weet présies hoe dit gaan eindig… Ek is met 100 (nee 200 goed) gelyktydig besig dat ek min by my skryftyd uitkom. Ek maak ‘n plan. Belowe! Ekself wil dit ook nou afhandel sodat ek kan begin skuur en skaaf aan Danie se editing in die tweede draft. ‘n Goeie boek het gewoonlik ‘n hele paar drafts. Dus kyk ons nou na Augustus 2025 vir publikasie van: SWEEF EN VAL – die opvolg van: Olifant op ‘n sweefstok.

Januarie was en ‘n lang-lang maand, sommige beweer dit het eintlik 60 dae en nie 31 nie! Ek verstaan dit heeltemal. My tweeling studente / jong volwassenes is terug en gereed vir hulle onderskeie finale jare op Universiteit. So vinnig het die tyd gevlieg.

My raad vir 2025: Hê jou voornemens, jou drome, doelstellings, wense en begeertes maar bestee jou tyd wys. Die lewe is langer as wat mens dink. Ook baie korter wanneer jy valslik vir jouself vertel: Daar is nog baie tyd oor om dit of dat te doen. Doen wat jy moet doen eerste, sodat jy kan doen wat jy wil doen so gou as moontlik. Bestuur jou tyd tussen ‘n balans van werk en rus.  Daar is ‘n verskil tussen rus en opgee. Opgee is NIE ‘n opsie nie.

Ek wens julle almal ‘n wonderlike 2025 toe. Mens hoop altyd die beste en my aanhaling vir die jaar is: “What you do not change, you choose. So lets promise ourselves to always look on the bright side!”

Baie dankie vir een en elkeen wat die tyd neem om my skryfels te lees. Dit is altyd ‘n voorreg om te probeer inspireer. Mag ek suksesvol wees daarin? Onthou, ek hoor graag van enige van my lesers sou julle ‘n epos wil stuur na my skrywers-epos-adres: lelanieroode@gmail.com  Julle is welkom. Ek mag dalk nie dadelik antwoord nie, maar ek probeer en is tot dusver suksesvol om almal persoonlik te kan antwoord.

Ek sluit af met my persoonlike motto: “HEART OVER MIND. MIND OVER MATTER. ALWAYS CHOOSE TO RISE – LIKE A PHOENIX. CARPE DIEM!”

Groete en seënwense tot volgende maand.